Восеньскі ўспамін [Міхась Стральцоў] (fb2) читать онлайн
[Настройки текста] [Cбросить фильтры]
Міхась СТРАЛЬЦОЎ
ВОСЕНЬСКІ ЎСПАМІН
Той восенню я жыў у вёсцы. Быў верасень, стаялі цёплыя, ціхія, поўныя празрыстасці і бляску дні. Кволасць і знямога, здавалася, былі разліты ў паветры, яны адчуваліся ва ўсім: у слабым зіхаценні ўжо халаднаватай смугі, у самотным іржышчы, што млява сірацела на сонцы.
Цэлымі днямі на вуліцы рыпелі вазы — з поля звозілі авёс і грэчку. Ля калгаснага гумна гудзеў камбайн, і ў перапынках між работай дзяўчаты спявалі:
Ой, наступае
Восень халадная,
Ой, ды ў бярозы
Лісток ападае.
Я чуў гэтую песню амаль кожны дзень, грузячы разам з хлопцамі на машыны высахлы з лета торф: мы прыехалі сюды з горада нарыхтоўваць паліва.
Начавалі і сталаваліся мы ў вёсцы, жылі па хатах. Мая гаспадыня была ўвішная, рухавая кабета, нягледзячы на свае пяць дзесяткаў год. Кожную раніцу я прачынаўся ад яе голасу: тупаючы па хаце, старая будзіла сына, крыху гультаяватага хлопца:
— Мікіта, а-а Мікіта! — надрывалася яна.— Не, дачакаешся, лежань, што за ногі сцягну…
Мікіта адварочваўся да сцяны і нешта мармытаў.
— Выхворваешся ты ў мяне, вылежваешся,— бубніла цётка Аўгіння,— а тады зноў да галубоў… Павыкідваю пустэчу гэтую — дачакаешся…
— Не выкінеш… Не ты прынесла…— агрызаўся Мікіта сонным голасам.
— Ах, каб цябе,— злавалася старая,— дваццаць гадоў мае, а дзяцініцца…
3 галубамі Мікіта бавіў час, калі выпадала быць дома. Ён выпускаў іх з самаробнай скрынкі на дах, клаўся пад плот на траву і, не адрываючыся, сачыў за птушкамі. Яго драбнаваты твар мякчэў, губы кволіла ўсмешка, а ўважныя вочы глядзелі пільна з-пад доўгіх веек. Калі я быў у гэты час непадалёк, Мікіта, не паварочваючы галавы, клікаў мяне:
— Хадзі паглядзі, як галубы цалуюцца. Ты ж не бачыў мо!
Я лажыўся на траву побач з ім і глядзеў на забавы птушак. Белая галубка ціха і сумна буркавала, ля яе круціліся два галубы. Адзін — шызы, паважны — самавіта хадзіў, выпінаючы грудзі; другі — шчуплейшы, увесь час наскокваў на яго і адразу ж адбягаў.
Настырнасць шчуплага галуба па-дзіцячы радавала Мікіту.
— Ата-та! Так яго! — выгукваў ён і пляскаў далонямі па зямлі.— Бач, прыгожы, халера, як гарадская дзеўка. А скажы ты мне,— пытаўся раптам ён,— чаму гэта вашы дзеўкі прыгожыя, а нашы дык нязграбныя нейкія, га?
— Ну, што ты! — здзіўляўся я.— Бо прыглядзеліся табе свае.
— А можа, і так,— падумаўшы, згаджаўся Мікіта.— Вось Ганка… Яна яшчэ прыгажэйшая за гарадскіх.
— А хто яна, Ганка? Тут жыве?
— Во, ты і не бачыў… Яна ж да нас прыходзіць, маці памагае.
— Яна вам радня якая, ці што?
Мікіта, перш чым адказаць, зірнуў на мяне і немаведама чаго засмяяўся. Я здагадаўся, што Ганка яму ніякая не радня, а пра большае і не думаў дазнацца. Але Мікіта раптам сам загаварыў:
— Маці мяне жаніць хоча, кажа: чаго ты, дурны, да яе падступіцца баішся. А я і праўда баюся Ганкі, сорамна неяк. Толькі калі вып’ю, дык праводжу…
— Ну і як?
— Ат, не ведаю… За ёй колькі бегала ўжо, ды ўсё так. «Два — сем» ногі сабе адбіў, бегаючы…
— Які «Два — сем»?
— Не ведаеш? Ну, шафёр наш. Дзеўкі яго так празвалі. Кажа: з адной жонкай два месяцы жыў, з другой — сем… Потым яшчэ Жэнька Бохан бегаў, той, што на ляснічага недзе вучыцца. Гэты дык і праўда брыдкі нейкі: як дзеўка, рознымі мазямі мажацца ды валасіны лічыць, колькі вылезе…
Ганку я ўбачыў на другі дзень, пад вечар, калі прыйшоў з работы. Гаспадароў дома не было. Я ўспомніў, што Мікіта яшчэ ўчора збіраўся ў суседнюю вёску па махорку, а старая павезла ў горад яблыкі.
У хаце, змораныя цеплынёй, саладкаватым пахам памідораў, што ляжалі навалам на падаконні, сонна гулі мухі. Ля печы стаялі недагледжаныя чыгункі з бульбай, у парозе валяўся на смецці венік. У цёткі Аўгінні было цяпер шмат работы, і ёй не было калі зважаць на такую дробязь, як парадак у хаце. «Сытаму ды здароваму ўсё добра»,— казала яна. Дома цётка Аўгіння хадзіла ў зашмальцаванай капоце, босая, у панчохах без ступакоў.
У той дзень мы нагрузілі многа машын, і я адчуваў сябе крыху стомленым. Сеў за стол, закурыў скамечаную, напалову высыпаную папяросу і стаў глядзець у акно. За плотам стаяў маўклівы і задуменны сад. Кранутае жаўцізной лісце холадна блішчала пад промнямі нізкага сонца, і буйныя гронкі пладоў былі заліты роўным васковым святлом. Сад нібы дагараў у нейкай урачыстай, апошняй знямозе.
На двары ляпнулі веснічкі, я падаўся да акна. Нейкая дзяўчына, невысокая, без хусткі, ішла да ганка, крыху схіліўшы галаву ў задуменнасці ці па звычцы. Я не паспеў яшчэ што-небудзь падумаць, як яна нечакана з’явілася на парозе і, убачыўшы мяне, затрымала руку на клямцы:
— А я… мне здалося, што гэта Мікіта дома.
Я адразу адчуў сябе няёмка, быццам быў вінаваты, што таго не было ў хаце, і чамусьці перапытаў:
— Вы да Мікіты? Ён…
— Чаму?
Мяне здзівіў яе голас, тое, як яна сказала гэта «чаму». Голас быў роўны, ціхі і глыбокі — з нейкімі густымі, дрымотнымі ноткамі. Я гдядзеў на яе, не ведаючы, ці запрасіць астацца, ці зноў сказаць пра Мікіту. А яна заўважыла ў парозе смецце, схапіла засланку і стала завіхацца з венікам. Тады я здагадаўся, што гэта Ганка. Я з цікавасцю паглядзеу на яе. Кідаліся ў вочы чорныя яе валасы, што спадалі на шчокі, на лоб. Нос быў прамы, зграбны. Шчокі расчырванеліся: можа, ад сарамлівасці, а можа, ад старання.
Я чамусьці не стрымаў сябе і сказаў:
— Канешне, вы Ганка, і я ведаю вас.
Яна выпрасталася і без здзіўлення глянула на мяне:
— I я вас ведаю…
— Адкуль?
— Бачыла, мы ж суседзі…
Я змоўчаў. Ганка ўзяла засланку са смеццем і выйшла з хаты.
— Мне яшчэ трэба бульбы накапаць,— сказала яна, вярнуўшыся.— А можа, вы есці хочаце, дык я пашукаю.
Яе шчырая прастата ўразіла мяне, няёмкасць адразу прайшла, і я загаварыў жартаўліва:
— Не, не трэба, я лепш пайду з вамі на агарод. Памагу ды заадно пагляджу, на што вы здатныя. Можа, цётка Аўгіння благую выбрала нявестку.
Ганка зірнула на мяне спакойнымі прамяністымі вачамі, а мне аж балюча стала за іх ясную даверлівую чысціню.
— Чаму? — выдыхнула Ганка.— Я памагаю цётцы Аўгінні… Яна просіць. Навошта ж вы так?
— Я больш не буду,— паспяшаўся апраўдаццая.— Пойдзем. Возьмем рыдлёўку і пойдзем.
Мы выйшлі з хаты, пералезлі цераз невысокі абціснуты плот і апынуліся ў агародзе. Паміж яблынямі тырчалі пачарнелыя кусты бульбоўніку; у барознах трапляліся яблыкі. Пахла падапрэлым лісцем, прэсным халадком зямлі — восень скупая на пахі.
— Як свежа,— сказаў я,— пах такі…
— Ага,— адгукнулася Ганка,— нейкі… нішчымны,— і павяла ў паветры рукой.
Мы ўзяліся за работу: я рыдлёўкай выкопваў бульбу, а Ганка падбірала яе. Неяк няўдала страсянуўшы бульбяны куст, я сыпнуў зямлёй на Ганчыны ногі. Ганка засмяялася і, скачучы на адной назе, стала здымаць тапачку, але не ўтрымалася і хіснулася ўбок, я выставіў рукі, каб падтрымаць яе, і незнарок крануўся дзявочых грудзей. Гэта выйшла так нечакана, што я разгубіўся, а калі падняў вочы, то якраз перад сваім тварам убачыў Ганчыны вусны, і мне на момант здалося, што я адчуў іх дрыготную цеплыню… Ганка адхіснулася і паволі стала вытрасаць пясок з тапачкі. Я падбіраў рассыпаную бульбу. Маўчалі.
— А вунь і цётка Аўгіння…— загаварыла першая Ганка.
Старая ішла не з вуліцы, а напрасткі праз поле. Яна ўбачыла нас, падышла бліжэй, торкнула рукою пад хустку, папраўляючы валасы, і, заклапочаная, паскардзілася:
— Ах, каб цябе… Зацягалася зусім… А табе Мікалай памагаў…— і яна неяк вымушана ўсміхнулася.— Дык хадзем, Ганначка, у хату: я тут селядцоў купіла, можа, сваім занясеш.
— Ой, што вы, цётка Аўгіння! Не трэба нам. Я пайду.
— От, скажы ты, не трэба ёй…— загаварыла ўслед Ганцы старая.— У цёткі, дзе яна жыве, шасцёра душ… Не пашчасціла дзеўцы: бацька памёр, як і мой гаспадар, а потым і маці… Дык я і думаю: вось каб яны з Мікітам сышліся. I мне падмога якая, і хлопца ў рукі ўзяла б. Добрая дзеўка, ой, добрая!
— Ага! — услед за старой сказаў і я.
— Ну вось і ты кажаш… Падабаецца, бачу…
Мне і праўда падабалася Ганка, і здавалася, што толькі са мной яна трымалася так шчыра, ласкава, што толькі на мяне даверліва глядзелі яе вочы.
— Охо-хо! — уздыхала старая.— Такую дзеўку хоць каму — няшчасця не меў бы… А дзе гэта сёння Мікіта?..
Мікіта прыйшоў, калі ўжо зусім сцямнела. П’янаваты, галодны, ён накінуўся на селядцы і ўсё бурчаў, што не зварылі бульбы. Я таксама прагаладаўся, і яда была мне ўсмак.
— Пайшлі гуляць,— нарэшце ўстаў з-за стала Мікіта.— У Хведарчыхі дзеўкі ўжо даўно сабраліся… Дык пойдзеш?
Я згадзіўся.
— Куды ты? — занепакоілася цётка Аўгіння.— Ля саду пабыў бы, а то залезе ліхадзей які — усё голле па-трушчыць…
— Цэлы твой сад будзе,— адмахнуўся Мікіта і пацягнуў мяне з хаты…
— Бачыў тваю суседку,— сказаў я яму на вуліцы.
— Спадабалася?
— Нічога сабе. Будзеш яе сёння праводзіць?
— Чаму ты пытаеш? — усміхнуўся Мікіта.
— Ды ты ж выпіў, бачу…
— Якое там…
Мы зайшлі ў нечую хату, дзе і сапраўды было многа дзяўчат. Нікога з іх я не ведаў, акрамя Ганкі, якая ветліва ўсміхнулася нам і зашаптала нешта сваёй суседцы. Тая, убачыўшы незнаёмага, паспешліва паправіла хустку, непрыкметна выпусціўшы на лоб узбітыя кудзеркі. Мы прайшлі да стала, за якім заўзята пыхкалі цыгаркамі хлопцы, і прыладзіліся там на лаве. Закурылі. У шызых палосах дыму патрывожаная лямпа гайдалася, як на хвалях.
— Мікіта! Мікалай! — гукнула Ганка.— Ідзіце сюды! I вы, хлопцы, таксама: будзем гуляць у фанты.
Прапанова ўсім спадабалася, заядлыя дымакуры падняліся з-за стала, ажывіліся дзяўчаты. Адразу стала шумна. Гаспадароў штосьці не было відаць, толькі нехта спаў на печы. Я пайшоў да Ганкі і сеў побач з ёю.
Пачалася насцярожаная, шумлівая гульня. Ганку выклікалі часцей за другіх, а я, чамусьці засмучоны, ні разу не назваў яе.
— Чаму вы невясёлыя? — спыталася ў мяне Ганка.— Глядзіце, прайграеце — потым не адкупіцеся.
Але яна сама была няўважлівая. У яе ўжо забралі брошку, а потым, смеючыся, яна дастала з валасоў грабеньчык. У мяне забралі партабак.
— Хопіць! — выкрыкнуў нехта.— Давайце судзіць!
Двое хлопцаў адразу забралі фанты, падаліся ў парог і доўга нешта там шапталіся. Потым адзін з іх выйшаў на сярэдзіну хаты і, хаваючы рукі за спіною, спытаў:
— Што гэтаму фанту?
— Прывезці з лесу дровы! — пачуліся галасы. Нехта засмяяўся.
Хлопец выставіў перад сабою мой партабак. Я разгубіўся, не ведаючы, што трэба рабіць у такім выпадку, але мне падказалі. Я выйшаў на двор і пагрукаў у сцяну знойдзеным на двары паленам.
Падышла чарга і да Ганкі: яе прымусілі танцаваць «Лявоніху», і, саромеючыся, яна прайшлася ў танцы па хаце. Потым судзілі два фанты разам, і Ганцы выпала цалавацца з нейкім хлопцам. Той падступіўся да яе, угаворваў, пазіраючы на прысутных: глядзіце во, я раблю сваю справу, усё залежыць не ад мяне. Але Ганка адварочвалася і штурхала занадта стараннага хлопца ў грудзі. Усе закрычалі, пачалі настойваць, Ганка раззлавалася, села на лаву і, прыціхлая, абыякава глядзела на гульню.
Самая пара была ісці дамоў. Я сказаў пра гэта Мікіту, але ён хацеў астацца: ніхто яшчэ не думаў разыходзіцца. Я неўпрыкмет выйшаў.
Над вёскай ціха распасцерлася месячная ноч. Густыя цені ляжалі на вуліцы. Дзесьці, відаць, на калгасным двары, моцна гаманілі. Залівіста брахаў сабака. Я пачуў, як нехта мяне лёгка наганяў. Я абярнуўся і ўбачыў Ганку.
— Дамоў?
— Ага…
Мы пайшлі побач — паволі, не размаўляючы. Часам плечы нашы краналіся, і тады Ганка сарамліва і ціха смяялася. Я ўзяў яе руку ў сваю і пачаў перабіраць пакорлівыя цёплыя Ганчыны пальцы. У гэтую хвіліну яна здавалася мне такой зразумелай, такой блізкай…
Мы спыніліся ля нечай хаты. На дарогу ярка клаўся чорны цень ад плота. Я лёгка прыцягнуў Ганку за рукі і, схіліўшыся, стаў цалаваць яе ў цёплыя, трошкі шурпатыя губы. Ганка тулілася да мяне і маўчала…
I я маўчаў таксама.
Ёсць хвіліны прыемнай блізкасці паміж людзьмі, нейкай ціхай узрушанасці і лагоды, светлай, як восеньскі дзень. Гэта добрыя хвіліны і добрая блізкасць, якой не трэба слоў. А мне ж падабалася Ганка, мне было хораша з ёю, не думаў я тады і пра Мікіту.
Але ён сам напомніў аб сабе. Ён ішоў па вуліцы і быў ужо непадалёк ад нас. I я, і Ганка бачылі гэта. «Не выседзеў,— з нейкай злосцю падумаў я,— Ганка ўцякла…» Не згаворваючыся, мы ціха адступілі да плота, падаліся ў двор і прытуліліся там да сянец. Мікіта прайшоў неўзабаве: ён, мусіць, бачыў нас і ўсё зразумеў…
Я нядоўга заставаўся пасля яго. I толькі тады, калі Ганкі ўжо не было са мной, мне раптам стала сорамна за сябе і прыкра. Я ўспомніў учарашнюю размову з Мікітам, тое, як даверліва расказваў ён пра Ганку, сённяшнія словы цёткі Аўгінні і ніяк не мог ні зразумець, ні дараваць сабе нядаўні ўчынак.
Асцярожна зайшоў я ў хату, і, пакуль распранаўся, хацелася, каб Мікіта паклікаў мяне і загаварыў са мной. I ён сапраўды азваўся:
— У цябе ёсць курыць што? У мяне дык усё выкурылі — і не даць нельга…
Я ведаў, што Мікіта лгаў. Мне зрабілася яшчэ больш прыкра.
— Даўно прыйшоў? — з цяжкасцю вымавіў я.
— Я? Услед за табой… Як ты ад Хведарчыхі выйшаў…
— А-а… Ты ж яшчэ заставаўся…
Больш я не ведаў, што яму сказаць. Я паплёўся да сябе на ложак, каб доўга не заснуць у тую ноч…
А назаўтра вечарам да мяне падсела старая і, раз-пораз уздыхаючы і папраўляючы на галаве хустку, жаласліва загаварыла:
— Ці ёсць жа ў цябе, хлапечык, бацька, га? Яно добра, што ёсць: матцы падмога. А без бацькі цяжка, ой, як цяжка. Мой чалавек дык памёр, крэпкі быў мужчына, а памёр. I хвароба нейкая халерная падступілася: прастудзіў галаву, памарнеў з год — і няма чалавека… А сын дык з вайны галавы не прынёс. Прыгожы быў хлопец, не тое што Мікіта — дзеўкі гужам услед бегалі… Ах, што ж гэта я: малако трэба ў печ ставіць, за ноч, можа, і скісне.
Цётка Аўгіння мітусілася ля печы і ўсё гаварыла. «Прачула нешта,— падумаў я,— як непрыемна…» А старая зноў падышла да мяне, стала збоку, журботна схіліўшы галаву і апусціўшы рукі.
— Дзеўкі цяпер надта пераборлівыя сталі,— казала яна,— глядзяць, каб і прыгожы хлопец быў, і гарадскі яшчэ. А таго не ведаюць, што з чалавекам век векаваць: трэба, каб мужык добры быў… Мікіта вось мой. I дома памагае, і ў калгас дзень у дзень ходзіць… А другая ўсё шукае палаўчэй: ого!.. А ты жанаты, хлапечык, ці не? Гадоў табе, мусіць, многа…
Яна раптам засмяялася — нягучна, стрымана, нібы саромелася свайго смеху.
— Гэта я чула, што ты да дзеўкі нашай ходзіш,— не гледаячы на мяне, сказала яна і чамусьці выцерла твар фартухом.— Яно што ж…
I зноў ціха паскардзілася:
— Яно што ж… Маладому пагуляць хочацца, а другая думае, што чалавек да яе ўвесь…
Мне хацелася схлусіць, сказаць, што я жанаты, тады б старая разнесла гэта па вёсцы, і Ганка старанілася б мяне. Але, збянтэжаны, я прамаўчаў.
У той вечар я не пайшоў на вуліцу і рашыў не бачыцца з Ганкай. Мікіта ўжо не клікаў мяне на гулянкі і кожны вечар знікаў некуды адзін…
Надышла пара вяртацца ў горад. Я не адступіўся ад свайго рашэння і не сустракаўся з Ганкай. Аднойчы яна зайшла да нас у хату і гаварыла аб нечым са старой. Я ўвесь час прабыў за перагародкай і не паказаўся на кухню. Калі Ганка выйшла, не стрымаўся, зазірнуў у акно і ўбачыў, як яна, схіліўшы галаву, задуменна ішла да веснічак. Успомніўся першы яе прыход, стала балюча і журботна…
I вось з той пары прайшоў год, і зноў настала восень, якая ў горадзе не мае асаблівых прыкмет. У скверах шамаціць пад нагамі лісце, а пах зямлі, раскапанай экскаватарам, будзіць у памяці другую восень і другія дні. I я ўспамінаю Ганку, яе голас — роўны, глыбокі, з густымі дрымотнымі ноткамі…
Навошта я так абышоўся з ёю, чаму?
Мне хочацца зноў паехаць у вёску, убачыць Ганку, падысці да яе і сказаць: «Даруй мне, я ашукаў цябе і сябе таксама».
I мне не дае спакою восеньскі ўспамін.
1958
Последние комментарии
1 день 15 минут назад
1 день 4 часов назад
1 день 6 часов назад
1 день 8 часов назад
1 день 14 часов назад
1 день 14 часов назад